Chapter 4

¹hic liber mandatorum Dei et lex quae est in aeternum omnes qui tenent eam ad vitam qui autem dereliquerint eam in mortem ²convertere Iacob et adprehende eam ambula per viam ad splendorem eius contra lumen eius ³ne tradas altero gloriam tuam et dignitatem tuam genti alienae ⁴beati sumus Israhel quoniam quae Deo placent nobis manifesta sunt ⁵animaequior esto populus Dei memorabilis Israhel ⁶venundati estis gentibus non in perditionem sed propter quod in ira ad iracundiam provocastis Deum traditi estis adversariis ⁷exacerbastis enim eum qui fecit vos Deum aeternum immolantes daemoniis et non Deo ⁸obliti autem estis eum qui nutrivit vos et contristastis nutricem vestram Hierusalem ⁹vidit enim iracundiam a Deo venientem vobis et dixit audite confines Sion adduxit enim mihi Deus luctum magnum ¹⁰vidi enim captivitatem populi mei filiorum meorum et filiarum quam superduxit illis Aeternus ¹¹nutrivi enim illos cum iucunditate dimisi autem illos cum fletu et luctu ¹²nemo gaudeat super me viduam et desolatam a multis derelicta sum propter peccata filiorum meorum quia declinaverunt a lege Dei ¹³iustitias autem ipsius nescierunt nec ambulaverunt per vias mandatorum Dei neque per semitas veritatis eius cum iustitia ingressi sunt ¹⁴veniant confines Sion et memorentur captivitatem filiorum et filiarum mearum quam superduxit illis Aeternus ¹⁵adduxit enim super illos gentem de longinquo gentem inprobam et alterius linguae ¹⁶qui non sunt reveriti senem neque puerorum miserti sunt et abduxerunt dilectos viduae et a filiis unicam desolaverunt ¹⁷ego autem quid possum adiuvare vos ¹⁸qui enim adduxit super vos mala ipse vos eripiet de manibus inimicorum vestrorum ¹⁹ambulate filii ambulate ego enim derelicta sum sola ²⁰exui me stola pacis indui autem me sacco obsecrationis et clamabo ad Altissimum in diebus meis ²¹animaequiores estote filii clamate ad Dominum et eripiet vos de manu principum inimicorum ²²ego enim speravi in Aeternum salutem vestram et venit mihi gaudium a Sancto super misericordia quae veniet vobis ab Aeterno salutari nostro ²³emisi enim vos cum luctu et ploratu reducet autem vos mihi Deus cum gaudio et iucunditate in sempiternum ²⁴sicut enim viderunt vicinae Sion captivitatem vestram sic videbunt et in celeritate salutem vestram a Deo quae superveniet vobis cum honore magno et splendore aeterno ²⁵filii patienter sustinete iram quae supervenit vobis persecutus est enim te inimicus tuus sed cito videbis perditionem ipsius et super cervices ipsius ascendes ²⁶delicati mei ambulaverunt vias asperas ducti sunt enim ut grex direptus ab inimicis ²⁷animaequiores estote filii et proclamate ad Deum erit enim memoria vestra ab eo qui ducit vos ²⁸sicut enim fuit sensus vester ut erraretis a Deo decies tantum iterum convertentes requiretis eum ²⁹qui enim induxit vobis mala ipse rursum adducet vobis sempiternam iucunditatem cum salute vestra ³⁰animaequior esto Hierusalem exhortatur enim te qui te nominavit ³¹nocentes parebunt qui te vexaverunt et qui gratulati sunt in tua ruina punientur ³²civitates quibus servierunt filii tui punietur quae accepit filios tuos ³³sicut enim gavisa est in tua ruina et laetata est in tuo casu sic contristabitur in sua desolatione ³⁴et amputabitur exultatio multitudinis eius et gaudimonium eius erit in luctum ³⁵ignis enim superveniet ei ab Aeterno in longiturnis diebus et habitabitur a daemoniis in multitudinem temporis ³⁶circumspice Hierusalem ad orientem et vide iucunditatem a Deo tibi venientem ³⁷ecce enim veniunt filii tui quos dimisisti dispersos veniunt collecti ab oriente usque ad occidentem in verbo Sancti gaudentes in honorem Dei