Chapter 3

¹ Ko ahau te tangata kua kite i te pouri, he mea na te rakau o tona riri. ²I arahina e ia, i meinga kia haere i te pouri, kahore i te marama. ³He pono kua tahuri mai ia ki ahau, kua anga mai tona ringa ki ahau, a pau noa te ra. ⁴Kua meinga nei e ia oku kikokiko me toku kiri kia rite ki o te koroheke, mangungu kau i a ia oku wheua. ⁵Kua hanga e ia he patu moku; karapotia ana ahau ki te wai kawa, ki te raruraru. ⁶Kua meinga ahau e ia kia noho ki nga wahi pouri, kia pera me te hunga kua mate noa ake. ⁷Kua oti ahau te taiepa mai e ia, te puta atu ahau; kua meinga e ia toku mekameka kia taimaha. ⁸Ae ra, i ahau e karanga ana, e hamama ana kia awhinatia, ka araia mai e ia taku inoi. ⁹Kua oti ano oku ara te taiepa mai e ia ki te kohatu tarai, whakakopikopikoa ake e ia oku ara. ¹⁰Ko tona rite ki ahau kei te pea e whanga ana, kei te raiona i nga wahi ngaro. ¹¹Whakangaua ketia ana e ia oku ara, haehaea putia iho ahau; meinga ana ahau e ia kia noho kau noa iho. ¹²Kua whakapikoa e ia tana kopere, a whakaturia ake ahau e ia hei koperenga pere. ¹³Kua meinga e ia nga pere o tana papa pere kia ngoto ki oku whatumanawa. ¹⁴Kua waiho ahau hei katanga ma toku iwi katoa; hei waiata ma ratou a pau noa te ra. ¹⁵Kua whakakiia ahau e ia ki nga mea kawa, whakainumia rawatia ana ahau e ia ki te taru kawa. ¹⁶Kua whatiwhatiia ano hoki e ia oku niho ki te kirikiri, hipokina ana ahau e ia ki te pungarehu. ¹⁷Kua nekehia atu e koe toku wairua kei tata ki te rangimarie; i wareware ahau ki te pai. ¹⁸Ki tonu ake ahau, kua pirau toku kaha, kahore he tumanakohanga maku ki a Ihowa. ¹⁹Mahara ki toku ngakau mamae, ki toku pouri, ki te taru kawa, ki te wai kawa. ²⁰Maharahara tonu toku wairua ki a ratou, piko tonu iho i roto i ahau.

²¹ E whakahokia ake ana tenei e ahau ki toku ngakau, koia i tumanako ai ahau. ²²He mahi tohu na Ihowa te poto ai tatou, he kore no ana mahi aroha e mutu. ²³E hou tonu ana ratou i tenei ata, i tenei ata; he nui tou pono. ²⁴Ko Ihowa te wahi moku, e ai ta toku wairua; no reira ka tumanako ahau ki a ia. ²⁵He pai a Ihowa ki te hunga e tumanako ana ki a ia, ki te wairua e rapu ana i a ia. ²⁶He pai ano kia tumanako te tangata, kia tatari marie hoki ki ta Ihowa whakaora. ²⁷He pai ano mo te tangata kia amohia e ia te ioka i tona tamarikitanga. ²⁸Me noho ia, tona kotahi, me whakarongo puku hoki, no te mea nana i uta ki a ia. ²⁹Me tuku e ia tona mangai ki te puehu; mehemea pea tera he tumanakohanga. ³⁰Me hoatu e ia tona paparinga ki te tangata e papaki ana i a ia: kia ki tonu ia i te tawai. ³¹E kore hoki e mau tonu ta Ihowa panga: ³²Ahakoa whakapouri ia, ka aroha ano ia, ka rite ki te nui o tana mahi tohu. ³³Kahore hoki ona ngakau whiu, whakapouri ranei, i nga tama a te tangata. ³⁴Ko te kuru i nga herehere katoa o te whenua ki raro i ona waewae; ³⁵Ko te whakapeau ke i te tika o te tangata ina whakawakia i te aroaro o te Runga Rawa; ³⁶Ko te whakariro ke i ta te tangata ina totohe, e kore tena e whakapaingia e te Ariki.

³⁷ Ko wai tenei hei ki mai, a ka oti, i te mea kihai i whakahaua e te Ariki? ³⁸He teka ianei e puta mai ana te kino me te pai i roto i te mangai o te Runga Rawa? ³⁹He aha te tangata ora i amuamu ai, te tangata ina whiua mo ona hara? ⁴⁰E rapu tatou, e kimi i o tatou ara, a ka tahuri ano ki a Ihowa. ⁴¹Kia ara atu o tatou ngakau me o tatou ringa ki te Atua i te rangi.

⁴² I he matou, i whakakeke; kihai ano koe i muru i to matou he. ⁴³Kua hipokina nei e koe ki te riri, tukinotia ana matou e koe: tukitukia ana e koe, kihai ano i tohungia e koe. ⁴⁴Hipokina ana e koe he kapua ki a koe, kei puta atu ta matou inoi. ⁴⁵Kua meinga matou e koe hei paru tahinga, hei mea akiri i waenga i nga iwi. ⁴⁶Kua hamama mai nga mangai o o matou hoariri katoa ki a matou. ⁴⁷Ko te wehi, ko te rua, kua tae mai kei a matou, te whakamoti me te wawahi. ⁴⁸Kei te tarere nei nga awa wai i toku kanohi, mo te wawahanga o te tamahine a toku iwi. ⁴⁹Maturuturu ana te wai i toku kanohi, kahore hoki e mutu, te ai he pariratanga, ⁵⁰Kia titiro mai ra ano a Ihowa, kia kite mai ra ano ia i runga i te rangi. ⁵¹E meatia iho ana toku ngakau e toku kanohi, mo nga tamahine katoa o toku pa. ⁵²Kua whaia kinotia ahau ano he manu e ratou, e te hunga e hoariri ana ki ahau, kahore he take. ⁵³Ngaro iho i a ratou toku ara i roto i te poka, kua maka e ratou he kohatu ki runga ki ahau. ⁵⁴I rere nga wai i runga i toku mahunga: i mea ahau, kua motuhia ketia ahau.

⁵⁵ I karanga ahau ki tou ingoa, e Ihowa, i roto i te poka i raro rawa. ⁵⁶I rongo koe ki toku reo; kaua e huna tou taringa ki te tanga o toku manawa, ki taku karanga. ⁵⁷I whakatata mai koe i te ra i karanga ai ahau ki a koe; i ki mai koe, Kaua e wehi. ⁵⁸Kua tohea e koe, e te Ariki, nga tohe a toku wairua; kua hokona e koe toku ora. ⁵⁹Kua kite koe, e Ihowa, i te he i mahia ki ahau: mau e whakarite taku whakawa. ⁶⁰Kua kite koe i to ratou mauahara katoa, i o ratou whakaaro katoa moku. ⁶¹Kua rongo koe ki ta ratou tawai, e Ihowa, ki o ratou whakaaro katoa moku; ⁶²Ki nga ngutu o te hunga i whakatika mai ki ahau, ki ta ratou tikanga moku, a pau noa te ra. ⁶³Tirohia mai to ratou nohoanga iho, to ratou whakatikanga ake; ko ahau te waiatatia nei e ratou. ⁶⁴Hoatu he utu ki a ratou, e Ihowa, kia rite ki te mahi a o ratou ringa. ⁶⁵Hoatu ki a ratou he ngakau pakeke, tau kanga ki a ratou. ⁶⁶Whaia ratou i runga i te riri, whakangaromia atu ratou i raro i nga rangi o Ihowa.